Kirchenslavica: [Psaltir’ ryfmotvornym slogi] Psaltirʹ carja i proroka Davida, chudožestvom ryfṁotvornym ravnoměrno slogi, i soglasnokonečno, po različnym stichov rodom preložennaja

The database of Church Slavonic (old) prints of the SBB-PK offers an overview of the prints and the approximately 1000 pages obtained and proofread with Transkribus in "Ground Truth" quality. The full text search in the text corpus of the GT data can be carried out via this widget.

Page-Nr	Page-Content [51]
9	ПРЄДИСЛѺ́ВЇЄ къ бл҃гочести́вомꙋ чита́телю. Наставле́нїемъ десни́цы прави́телѧ вселе́нныѧ, воз̾рачи́телствовавшꙋ мѝ трꙋдолю́бное вестѝ житїѐ, во̀ взыска́нїи бжⷭ҇твенныхъ писа́нїй глꙋбоча́йшагѡ ра́зꙋма, и҆ в̾ни́хъ ѹ҆́мныхъ сокро́вищъ та́йнѡ положе́нныхъ, нѐ є҆́же тѣ́ми мы́сленными бога́тствы, є҆ди́номꙋ мѝ красова́тисѧ и҆ богатѣ́ти: но̀ да̀ и҆ цр҃кви православнѡкаѳолі́честѣй и҆з̾несꙋ̀ ѿни́хъ поле́знаѧ: Во̀ сла́вꙋ трїѵпоста́снагѡ во̀ є҆ди́номъ є҆стествѣ̀ Бг҃а, є҆гѡ̀ сама́гѡ посо́бїемъ, написа́хъ жи́телствꙋѧ въ црⷭ҇твꙋющемъ и҆ бг҃оспаса́емомъ гра́дѣ Москвѣ̀, Пе́рвѣе кни́гꙋ нари́чемꙋю, вѣне́цъ вѣ́ры православнѡкаѳолі́ческїѧ: Та́же, ѡ҆бѣ́дъ дꙋше́вный: Тре́тїе, ве́черю дꙋше́внꙋю: Четве́ртое, Ве́ртъ многѡцвѣ́тный: Се́й ѹ҆́бо Рѵѳми́чески, по̀ чи́нꙋ а҆лфави́та славе́нскагѡ дїале́кта. И҆ внегда̀ мѝ дости́гнꙋти Пи́смене Ѱ, в̾падѐ во̀ ꙋ҆́мъ, Ѱалмы̀ покаѧ́нныѧ преложи́ти стіхотво́рнѣ: Ꙗ҆̀же бг҃ꙋ посо́бствовавшꙋ ѹ҆до́бнѣ преве́дъ, мню̀ ꙗ҆́кѡ томꙋ́жде в̾дохнꙋ́вшꙋ мѝ во̀ се́рдце, возлюби́хъ и҆ на̀ всѣ́хъ Ѱалмѡ́въ трꙋ́дъ пꙋсти́тисѧ. И҆ с̾ толи́кимъ трꙋди́хсѧ прилѣжа́нїемъ, ꙗ҆́кѡ па́че мѧ̀ нꙋ́дѧше бл҃гохотѣ́нїе ко̀ соверше́нїю тогѡ̀ \| [JPG]
10	тогѡ̀ дѣ́ла предпрїѧ́тагѡ, не́же ѡ҆быко́ша ла́комѡ жела́ю́щїи прбы́ткѡвъ тлѣ́нныхъ гпⷭ҇дїе, рабы̀ своѧ̀ нꙋ́днти дне́мъ и҆ но́щїю ко̀ трꙋдѡ́мъ дома́шнимъ. И҆́ посо́бїемъ бж҃їимъ въ не мно́зѣхъ мцⷭ҇ѣхъ, дѣ́ло соверше́нїемъ ѹ҆вѣнча́сѧ: И҆́мѣ́хъ же вины̀ подви́гшыѧ мѧ̀ на̀ дѣ́ло сїѐ послѣ́дꙋющыѧ: А҃: ѡ҆брѣто́хъ въ писа́нїи творцє́въ восто́чныхъ и҆ за́падныⷯ, ꙗ҆́кѡ Ѱалмы̀ в̾ нача́лѣ сѝ на̀ є҆вре́йстѣмъ ꙗ҆зы́цѣ соста́вишасѧ хꙋдо́жествоⷨ стїхотворе́нїѧ. Ѿ восто́чныхъ свидѣ́телствꙋетъ ѡ҆се́мъ Кѵрі́ллъ бжⷭ҇твенный, и҆̀же в̾ сло́вѣ з҃ мъ, на̀ і҆ꙋлїа́на ѿстꙋ́пника, ѡ҆ Ѱалмѣ́хъ гл҃етъ си́це: Є҆ди́нъ І҆ꙋлїа́нъ не́навистїю бл҃гоче́стїѧ пїити́чество бы́ти ѹ҆ є҆вре́й прекосло́витъ. Ѿ запа́дныхъ же Нїкола́й лѵра́нъ,, и҆́же бѣ̀ ро́домъ и҆ вѣ́рою пре́жде є҆вре́инъ, пото́мъ в̾ за́паднѣй це́ркви ѹ҆чи́тель, на̀ всю̀ вївлі́ю толкова́нїе сотвори́вый, и҆з̾ є҆вре́йскагѡ ꙗ҆зы́ка на̀ лати́нскїй, въ толкова́нїи Ѱалти́ри мно́жицею помина́етъ, Ѱалти́ръ стїхотво́рнѡ пи́санꙋ бы́ти на̀ є҆вре́йстѣмъ дїале́ктѣ. Є҆щѐ и҆ є҆вре́йскїй ѹ҆чи́тель Ра́вви мѡѵсі́й гл҃етъ ѡ҆не́й си́це: Стїѝ дре́внихъ ст҃и сꙋ́ть: Ꙗ҆́кѡ въ Ѱалмѣ́хъ двости́шїѧ, и҆на́ѧ мѣ́рѧтсѧ и҆звѣ́стнымъ сло́гѡвъ число́мъ: Та́кѡ, да̀ \| [JPG]
11	да̀ пе́рвый сті́хъ, ѻ҆́во є҆́сть до́лжшїй, ѻ҆́во кра́тшїй: И҆на́ѧ мѣ́рою состоѧ́тъ ра́вною, ра́звѣ ꙗ҆́кѡ стїсѝ ра́зиствꙋютъ число́мъ сло́гѡвъ, нѐ време́нъ: И҆́бо то̀ ра́знствїе и҆сполнѧ́ютъ чре́зъ ѹ҆ше́съ согласова́нїе, и҆ горта́нныхъ движе́нїѧ: и҆лѝ поглоща́ютъ нера́венство лагодѣ́нїемъ и҆ сладкопѣ́нїемъ. Втора́ѧ вина̀ є҆́сть, ꙗ҆́кѡ на̀ є҆́ллинстѣмъ, на̀ лати́нстѣмъ ꙗ҆зы́цѣⷯ прилꙋчи́мисѧ ѱалти́ръ стїхотво́рнѡ преведе́ннꙋю ви́дѣти: ви́дѣхъ и҆ на̀ прїи́скриемъ на́шемꙋ славе́нскомꙋ ꙗ҆зы́кꙋ дїале́ктѣ по́лскомъ кни́ги печа́тныѧ, ѱалти́ръ стїхотво́рнѡ преложе́ннꙋю содержа́щыѧ, нѐ то́чїю во̀ страна́хъ по́лскихъ: но̀ и҆ въ црⷭ҇твꙋющемъ гра́дѣ Москвѣ̀ ѡ҆бноси́мыѧ. Поревнова́хъ ѹ҆́бѡ, да̀ и҆ на̀ на́шемъ ꙗ҆зы́цѣ славе́нстѣмъ, понѐ в̾ на́шихъ страна́хъ рѡссі́йскихъ ѡ҆брѣта́етсѧ. Тре́тїѧ ви́на, ꙗ҆́кѡ мно́зи во̀ всѣ́хъ страна́хъ ма́лыѧ, бѣ́лыѧ, че́рныѧ, и҆ черво́ныѧ рѡссі́и, Па́чеже во̀ вели́цѣй рѡссі́и въ само́мъ црⷭ҇твꙋющемъ и҆ бг҃оспаса́емомъ гра́дѣ Москвѣ̀, возлю́блше сла́дкое, и҆ согла́сно пѣ́нїе, по́лскїѧ ѱалти́ри стїхо́внѡ преложе́нныѧ, ѡ҆быко́ша ты́ѧ ѱалмы̀ пѣ́ти, рѣче́й ѹ҆́бѡ, и҆ли ма́лѡ, и҆лѝ ничто́же зна́юще, и҆ то́чїю \| [JPG]
12	и҆ то́чїю ѡ҆сла́дости пѣ́нїѧ ѹ҆веселѧ́ющесѧ дх҃о́внѣ. Да̀ ѹ҆́бѡ со̀ сла́достїю пѣ́нїѧ, и҆ пое́мыⷯ ра́зꙋмъ содержа́ще, разꙋ́мнѡ хва́лѧтъ гдⷭ҇а, преведо́хъ Ѱалмы̀ славе́нскїѧ на̀ разли́чныѧ стіхѡ́въ ро́ды. И҆̀мже всѧ̀ гласѡ́въ поⷣзна́менованїѧ, ꙗ҆̀же сꙋ́ть на̀ Ѱалмы̀ по́лскїѧ, приключи́тисѧ мо́гꙋтъ. Нѐ всѧ́кагѡ ѹ҆́бѡ Ѱалма̀ по́лскагѡ пѣ́нїю, тогѡ́жде числа̀ славе́нскїй подложе́нїеⷨ зна́менїй, мо́жетъ соѿвѣ́товати, ꙗ҆́кѡ нѐ всѧ̀ тѣ́мже преведо́хъ ро́домъ стіховныⷨ, ѻ҆́во за̀ трꙋ́дность превожде́нїѧ: Ѻ҆́во ꙗ҆́кѡ нѐ всѣⷯ мѝ Ѱалмѡ́въ по́лскихъ гла́сы сꙋ́ть и҆звѣ́стни. ѻ҆ба́че во̀ и҆нѣ́хъ Ѱалмѣ́хъ по томꙋ̀ ро́дꙋ преведе́нныхъ, мо́щно є҆́сть жела́емое подложи́ти пѣ́нїе. То́же и҆звѣ́ствꙋю, ꙗ҆́кѡ нѐ подража́хъ прево́дника по́лскагѡ во̀ ꙋкраше́нїи пїити́ческомъ, нѝ въ толкова́нїи є҆́же проти́вꙋ є҆врейскагѡ: Но̀ держа́хсѧ слове́съ Ѱалти́рныхъ всѧ́чески, и҆ ра́зꙋма толкова́нїѧ прили́чнагѡ. Се́ же нѐ ꙗ҆́кѡ то̀ нѐ подоба́ющее є҆́сть, Но̀ с̾нисходѧ̀ ѻ҆бы́чаю ро́да и҆ страны̀: да̀ не рекꙋ́тъ проти́вно бы́ти пра́вдѣ. Нижѐ да̀ ѹ҆диви́шисѧ томꙋ̀ чнта́телю бл҃гочести́вый, ꙗ҆́кѡ нѣ́каѧ словеса̀, и҆ цѣ́лыѧ стїхѝ ѡ҆брѧ́щеши прида́ныѧ, сїѧ́ бо сꙋ́ть во̀ и҆сполне́нїе ра́зꙋма и҆лѝ стїхѡ́въ. А҆ и҆дѣ́же нѣ́каѧ рече́нїѧ ѿѧ́шасѧ, та̀ за̀ нꙋ́ждꙋ, ꙗ҆́кѡ \| [JPG]
13	ꙗ҆́кѡ нѐ в̾мѣсти́шасѧ в̾ стїхѝ мѣ́рою: ѻ҆ба́че въ ра́зꙋмѣ ника́кѡ скꙋ́дости дѣ́ютъ. є҆щѐ и҆дѣ́же и҆змѣне́нїе нѣ́кое ѹ҆́зриши, то̀ непщꙋ́й свѣ́ташагѡ ра́ди и҆столкова́нїѧ ѱалмѡⷡ҇ бы́ти. Толкова́нїе бо нѐ тѣ́ми словесы̀, и҆̀же сꙋ́ть в̾ сꙋ́щемъ быва́етъ, но̀ и҆нѣ́ми и҆ ѹ҆до́бншими: да̀ сꙋ́щагѡ неꙋдо́бное ѿкрове́нно бꙋ́детъ. Напослѣ́докъ, ꙗ҆̀же ѹ҆́зриши нѐ и҆столкова́нна, нѐ ѹ҆диви́сѧ: Нижѐ бо намѣ́ренїе моѐ здѣ бы́сть до чи́ста ѱалмы̀ толкова́ти, но̀ то́чїю стїхотво́рнѡ превестѝ ѧ҆̀, с̾ толи́кимъ и҆з̾ѧсне́нїемъ, є҆ли́кѡ в̾мѣсти́тисѧ мо́жетъ. Сїѧ̀тѝ бл҃гочести́вый чита́телю и҆звѣсти́въ, молю̀ да̀ прїѧ́тнѡ чита́ѧ и҆ поѧ̀ Ѱалмы̀, моѧ̀ трꙋды̀ возда́си мѝ, понѐ є҆ди́нѣм̾ ко̀ бг҃ꙋ моле́бнагѡ сло́ва ѡ҆ спасе́нїи дꙋшѝ моеѧ̀ грѣ́шныѧ воⷥсла́нїемъ: А҆́зъ же тѝ здра́во и҆ ве́селѡ чита́ти ѧ҆̀, и҆ пѣ́ти чре́зъ мно́га лѣ́та, жела́ю: И҆ нбⷭ҇нымъ пѣснопѣ́вцомъ причте́ннꙋ бы́ти во̀ странѣ̀ при́снѡ веселѧ́щихсѧ ѹ҆се́рдствꙋю. Всѣ́мъ правосла́внымъ всѧ́кихъ бл҃гъ и҆́тинный рачи́тель, Сѵмеѡ́нъ по́лоцкїй, і҆еромона́хъ недосто́йный. К̾ бл҃гочести́вомꙋ \| [JPG]
14	Къ бл҃гочети́вомꙋ же чита́телю. Бл҃гочести́вый кни́ги чита́телю. во̀ писа́нїихъ жи́зни и҆ска́телю, Молю́ тѧ, здра́вымъ ѹ҆мо́мъ да̀ сꙋдиши трꙋ́дъ, н҆́же в̾ кни́зѣ предлежа́щей зри́ши: Нѐ сло́въ и҆змѣ́нꙋ то́щнѡ раз̾сꙋжда́ѧ, но в̾ тѣ́хъ ра́зꙋма є҆ди́нство лобза́ѧ. Ѱалти́рь сѐ, цр҃ѧ̀ кꙋ́пнѡ и҆ проро́ка дв҃да ст҃а, та́йна в̾не́й глꙋбо́ка: Ꙗ҆̀же дх҃ъ ст҃ы́й ѻ҆́номꙋ сказа́ше, та̀ пррⷪ҇о́чески в̾ Ѱалмѣ́хъ ѻ҆́нъ писа́ше. Всѧ́каѧ слꙋ́жба тѣ́ми ѹ҆краше́нна, во̀ цр҃кви ст҃ѣ́й: всѧ̀ в̾ни́хъ бжⷭ҇тве́нна. Без̾ Ѱалмѡ́въ цр҃кви нѐ возмо́жнѡ бы́ти, ꙗ҆́кѡ без̾ воды̀ ры́бѣ нѐ лѣ́ть жи́ти. Та̀ в̾ свое́мъ чн́нѣ, ꙗ҆́кѡ преведе́нна дре́ве, во̀ цр҃кви да̀ бꙋ́де́тъ хране́нна. Тꙋ́жде а҆́зъ рѵ́ѳмы, тща́хсѧ преложи́ти, нѐ дабы̀ та́кѡ в̾ цр҃кви чте́ннѣй бы́ти: Но̀ є҆́же в̾ до́мѣхъ ча́стѡ ю҆̀ чита́ти, и҆лѝ сла́дкими гла́сы воспѣва́ти, Во̀ сла́вꙋ бг҃ꙋ: н҆́бо ѹ҆слажда́етъ рѵ́ѳмъ, слꙋ́хъ и҆ срⷣце: честѝ понꙋжда́етъ. Кѡ́льже є҆́сть лꙋ́чше сїю̀ прочита́ти, не́же в̾ сꙋета́хъ вре́мѧ погꙋблѧ́ти, Зна́етъ \| [JPG]
15	Зна́етъ то̀ ко́ждо. а҆ то̀ и҆звѣща́ю, по є҆ли́кꙋ са́мъ спасти́сѧ жела́ю: Ꙗ҆́кѡ, а҆́ще здѣ̀ зри́тсѧ но́во дѣ́ло, ѻ҆́ба́че ра́зꙋмъ Ѱалмѡ́въ храни́тъ цѣ́лѡ. То́лкъ слова̀ мѣни́тъ, мно́жиⷮ, ѹ҆менша́етъ: подо́бнѣ въ рѵ́ѳмѣхъ нꙋ́жда содѣва́етъ. Са́мо сꙋ́щее, въ цр҃кви цѣ́ло тебѣ, здѣ̀ метафра́зисъ к̾ дома́шнѣй потре́бѣ. Во̀ мно́зѣхъ мѣ́стѣхъ то́лкъ здѣ̀ положи́сѧ, є҆́же во̀ сꙋ́щемъ глꙋбо́кѡ сокры́сѧ. Тѣ́мъ нѐ диви́сѧ ви́дѧ и҆́но сло́во, ра́зꙋмъ є҆ди́нъ є҆́сть, рече́нїе но́во Свѣ́тлости ра́ди, лѝ за̀ нꙋ́ждꙋ мѣ́ры: то́лкъ ѿверза́етъ си́хъ сокро́вишъ две́ри. Нѐ слꙋ́шли бꙋ́ихъ и҆ ненака́занныхъ, въ тмѣ̀ невѣ́жества ѕло́бою свѧ́занныхъ, И҆́мже ѻ҆бы́чай всѐ то̀ ѡ҆бхꙋжда́ти, є҆го́же гдⷭ҇ь нѐ дадѐ и҆̀мъ зна́ти. Нѐ бꙋ́ди ѻ҆́бщникъ раско́лы творѧ́щымъ, всю̀ мꙋ́дрость в̾ себѣ̀ заключе́ннꙋ мнѧ́щыⷨ: А҆ в̾ само́мъ дѣ́лѣ пребезꙋ́мнымъ сꙋ́щымъ, ѹ҆по́ромъ свои́мъ въ поги́бель текꙋ́щымъ. Нѝ зави́дѧщымъ подража́тель бꙋ́ди, и҆̀мже чꙋ́ждїи се́рдце гризꙋ́тъ трꙋ́ди. И҆́же бл҃гаѧ за за́висть хꙋхна́ютъ, со́вѣсть попра́вше, всѧ̀ ѹ҆ничижа́ютъ. Но̀ бꙋ́ди \| [JPG]
16	Но̀ бꙋ́ди пра́вый писа́нїи чита́тель, нѐ слѡ́въ лови́тель, но̀ ꙋ҆ма̀ и҆ска́тель. А҆ всѧ́кѡ по́лза и҆́мать бы́ти тебѣ, то́кмѡ прилѣ́жнѡ раз̾сꙋжда́ти тре́бѣ. Вѣ́ждь же и҆ сїѐ, ꙗ҆́кѡ Ѱалмѝ сі́и ѿ дре́внихъ време́нъ пи́сани ст҃і́и Ст҃їхѡ́въ мѣ́рою, ѿ мꙋ҄жъ ѹ҆мꙋдре́нныхъ до́брѣ є҆́ллинскимъ кни́гамъ и҆зꙋче́нныхъ. И҆ во̀ про́чїихъ сꙋ́ть стїхотворе́ни ꙗ҆зы́цѣхъ че́стныхъ, и҆ ст҃и в̾мѣне́ни. Ребнꙋ́ѧ ѹ҆̀бо, тща́хсѧ написа́ти на́шиⷨ славе́нскиⷨ, въ рѵ́ѳмѣхъ мі́рꙋ да́ти. Тѣ́мъ бл҃года́рнѡ примѝ трꙋды̀ сїѧ, н҆ны́мъ ѡ҆бы́чны, въ рѡссі́и новыѧ. Чтѝ, по́й разꙋ́мнѡ, хвалѝ и҆́ми бг҃а, ѿнегѡ́же мзда̀ бꙋ́детъ тебѣ̀ мно́га. И҆ за̀ мѧ̀ грѣ́шна є҆мꙋ̀ помоли́сѧ, хꙋ́лникѡмъ ѹ҆ста̀ загражда́ти тщи́сѧ. Защища́й добро̀, бг҃ъ защи́тникъ тебѣ, да́стъ здѣ̀ вѣ́къ до́лгїй, и҆ вѣ́чность на̀ нб҃ѣ. Є҆ѧ́же вѣ́рнѡ а҆́зъ тебѣ̀ жела́ю, ми́лости твое́й са́мъ сѧ порꙋча́ю. \| [JPG]
18	Хотѧ́й спасе́ннѡ днѝ своѧ̀ прежи́ти, свобо́денъ ѹ҆момъ ѿ печа́лей бы́ти: Да̀ тщи́тсѧ, Ѱалмы̀ по всѧ̀ днѝ чи́тати во̀ сла́вꙋ Бг҃ꙋ, и҆лѝ воспѣва́ти. И҆́бо и҆́хъ ра́зꙋмъ се́рдце возбꙋжда́етъ ко весе́лїю, и҆ ѹ҆́мъ наслаждаетъ. Ре́вность ко̀ бг҃ꙋ вели́кꙋю плодитъ, и҆з̾ сѣ́менъ слове́съ плоды̀ добро́тъ родитъ. Что̀ бг҃ꙋ жи́вꙋ ѹ҆го́дно быва́етъ, и҆ за то̀ дꙋ́шы пою́щихъ спаса́етъ. Мїрѧ́не пѣ́сни мі́ра ѡ҆ставлѧ́йте, въ мѣ́стѡ и҆́хъ Ѱалмы̀ Бг҃ꙋ воспѣва́йте: Ѻ҆́вы бо ѹ҆́мъ тлѧ́тъ, дꙋ́шы погꙋблѧ́ютъ, сі́и ѹ҆́мъ здра́вѧтъ, и҆ дꙋ́шы спаса́ютъ. Пѣ́нїе Ѱалмѡ́въ є҆́сть и҆збра́нно бг҃ꙋ, дꙋ́шъ на́шихъ скве́рнꙋ ѡ҆мыва́етъ мно́гꙋ: Ста́рыхъ ѹ҆тѣ́ха, ю҆́ныхъ краше́нїе, ѹ҆ма̀ ста́рчество и҆ соверше́нїе. Пѣ́нїе Ѱалмѡ́въ дꙋ́шы ѹ҆краша́етъ, а҆́гг҃лы свы́ше в̾ по́мощь призыва́етъ. Мо́ре вода́ми нѐ ѡ҆скꙋдѣва́етъ. а҆́ще ѧ҆̀ въ мно́гѝ рѣ́ки и҆злива́етъ. Ѱалти́ръ пѣ́нїемъ нѐ вѣ́сть ѡ҆скꙋдѣ́ти, а҆́ще ю҆̀ ве́сь мі́ръ всегда̀ бꙋ́детъ пѣ́ти. \| [JPG]
21	Ѱалти́ръ ц҃ѧ и҆ прⷪ҇рка дв҃да. рѵ́ѳмы преложе́ннаѧ. каѳі́сма, а҃. Ѱало́мъ, а҃. Бл҃жеⷩ҇ мꙋⷤ, и҆́же во̀ ѕлыⷯ совѣⷮ нѐ вхожда́ше, нижѐ на̀ пꙋтѝ грѣ́шныⷯ чл҃къ стоѧ́ше: нижѐ на̀ сѣда́лищѣⷯ восхотѣ̀ сѣдѣ́ти тѣⷯ, и҆̀же нѐ жела́юⷮ бл҃га разꙋмѣ́ти. Но̀ в̾ зако́нѣ гдⷭ҇ни во́лю полага́етъ, томꙋ̀ дне́мъ и҆ но́щїю себѐ поꙋча́етъ. бꙋ́детъ бо ꙗ҆́кѡ дре́во при вода́хъ сажде́нно, є҆́же да́ст̾ во̀ вре́мѧ си пло́д̾ сво́й нензмѣ́ннѡ. Ли́стъ є҆гѡ̀ нѐ ѿпаде́тъ, и҆ всѐ є҆́же дѣ́етъ, по̀ жела́нїю се́рдца ѻ҆́нагѡ ѹ҆спѣ́етъ. нѐ та́кѡ нечести́вый, н҆́бо и҆счеза́етъ ꙗ҆́кѡ пра́хъ, є҆го́же вѣ́тръ с̾ землѝ развѣва́еⷮ. а҃ Тѣ́мже а҃ \| [JPG]

ID	1815797932
Title	[Psaltir’ ryfmotvornym slogi] Psaltirʹ carja i proroka Davida, chudožestvom ryfṁotvornym ravnoměrno slogi, i soglasnokonečno, po različnym stichov rodom preložennaja
Jahr	V Moskvě - Tipografija Verchnjaja - 1680 - 8, [1], 126 Bl., Bl. 126-139, 18 Bl. 2°
Note	Titelbl. und Text in Rot- und Schwarzdr; +/- Autopsie nach Ex. der SBB Vorlageform der Veröffentlichungsangabe: V Carstvujuščem Velikom Gradě Moskvě, v Typografii Verchněj Zernova, A. Knigi kirillovskoj pečati, Nr. 359 In kyrill. Schr., kirchenslaw.
Subjects	Psaltir’
Cat-URL	https://stabikat.de/DB=1/XMLPRS=N/PPN?PPN=1815797932
URL	https://resolver.staatsbibliothek-berlin.de/SBB0003389C00000000
PURL	Citation link

Church Slavonic Old Prints

[Psaltir’ ryfmotvornym slogi] Psaltirʹ carja i proroka Davida, chudožestvom ryfṁotvornym ravnoměrno slogi, i soglasnokonečno, po različnym stichov rodom preložennaja